إجمالي مرات مشاهدة الصفحة

الجمعة، 6 مايو 2011

احمد فؤاد نجم : سيادة المخلوع .. ارجعلنا


مش انت واحد مننا ؟؟
...و عمرك في يوم ما سرقتنا
...ولا خدت مليم مننا
ما تيجي طب ترجعلنا
تقعد بأهلك وسطنا
أهو مرة تاكل أكلنا
وتلبس يا خويا من لبسنا
وتعيش في حارة او في شارع زينا
قلت ايه ؟؟ يا حارق دمنا
سيادة المخلوع ... ارجعلنا
وغداك يا سيدي عندي أنا
رز و بطاطس مسرطنة
لحمة ؟؟... مفيش من سنة
فاكهة ؟؟... تعيش انت و أنا
و الشاي .. بآخر معلقة م السكر اللي كان عندنا
اشرب و فوق وركز بقه .. علشان نكمل حكينا
سيادة الرئيس ... ارجعلنا
مش سبت الحكم .. لأجلنا ؟؟ـ
ما تيجي تسمع حكمنا !!ـ
أفكرك ؟؟ ولا انت فاكر زينا
قطار اتحرق من كام سنة
وغازنا اللي طار من أرضنا ... لعدونا
وعبارة مللي بيغرقوا ..!! غرقت في عرض البحر و راحوا أهلنا ... و الجاني فلسع مننا
ومركبة بأحلى شباب ... ييجوا من ايطاليا غرقانين .. والقرش ياكل لحمنا
والله كانوا زينا
ويمكن أحسن مننا
لهم بيوت و ولاد و عيشة و حلم .. زي حلمنا
اتغربوا و اتبهدلوا .. لما الفساد طال كل حاجة في أرضنا
واللي ما ماتش .. قاعد في غربته .. والغريب بيذلنا
اقول كمان ؟؟ ولا كفاية ... و اهو انت عارف عننا
أصبر هتسمع حكمنا
سيادة الرئيس ... ارجعلنا
ولو انت واحد مننا
فعلا يهمك أمرنا
بينا عالنائب العام .. تفتنله على ولاد الحرام ... مصوا بلدنا و دمنا
و افتن دي فتنة مش حرام .. ده حقنا
دا لو انت واحد مننا
أصبر هتسمع حكمنا
سيادة الرئيس ... ارجعلنا
اقعد معانا و زينا
هعرفك .....ـ
دي (أم خالد) أمنا
ودول أهل (سالي) أهلنا
و(عمر بن بنونة ) إبننا
فسر و احكي و قللهم .. و قللنا
واستسمح الروح اللي منورة في الجنة عند ربنا
هتقول مكنش قصدنا ؟؟ـ
دول ماتوا غصب عننا ؟؟ـ
كداب و فاجر .. و اللي يصدقك زيك .. والكدب ريحته منتنة
تتشل إيد اللي ضرب ،، و اللي أمر ،، و عليكوا لعنة ربنا
أصبر هتسمع حكما
أيوه بقول ارجع لنا
ياللي سرقت حلمنا
وغربتنا و نهبتنا ... و في كل حتة أهنتنا
إحنا اللي سال دمنا
في الأربعين و اسكندرية و التحرير يشهدلنا
آدي القفص ... أقف هنا
والشعب يحكم .. مش أنا
صدقني ... هي بينة
من فوق سبع سماوات .. قالها ربنا
العين بالعين والسن بالسن ... و هو دا بقه حكمنا ... و مفيش غيره عندنا

هناك 25 تعليقًا:

  1. أختيار جميل

    و الكلام حقيقى مش مجرد شعر و كلام

    و أستاذ فؤاد من القلائل اللى شعرهم يمس الجروح بدون تزيين

    ردحذف
  2. الله عليك
    ايوه كده
    قول كمان وكمان

    هناخد ايه من سكاتنا
    غير غدر هيملا بلدنا
    وزي الكل ما ماتوا
    هننهي بادينا حياتنا

    لكن لا وربي
    ما هوافق في يوم عدو
    يدوس علي خير ارضي

    بعزيمتي هحميكي يا بلدي
    يا بلد امي وابويا وجدي
    وهخلي الخير دايما
    علي ارضك يجي ويهدي


    هزرع ارضك أمان
    واستقرار يملا المكان
    وأشرب من نيلك يا مصر
    وارتوي واحس بحنان

    ردحذف
  3. قريت الشعر بجد يوجع قلب كل مصرى ويبكى كل عين ام اتحرمت منها ابنها وكل انسان مات من مرضى وفجر منو لله حسبى الله ونعم لوكيل ..فرعون وتعال يتفرعن علينا فى قناه العربيه ويقول ان بريئ لاسف ده غضب عليه من ربنا
    انو ميحسش او ظالم لسه العذاب جى فى الدنيا وفى الاخره

    ردحذف
  4. رامى
    انت اجمل ونفسي اشوفك من كتر ما سمعت عنك
    شكرا لزيارتك مدونتى المتواضعه
    نورتينى

    ردحذف
  5. السلام عليكم

    طبعا الثورة وايامها
    كانت كلمات نجم رفيق فى المظاهرات

    يعتبر نبض الشارع المصرى والرجل البسيط
    يستطيع التعبير عن حالنا ببساطة وسهولة وبدون تعقيد

    شكرا لك اخى الكريم على حسن الاختيار
    دمت بخير

    ردحذف
  6. ساسو
    اطمنى مفيش خوف تانى مفيش ظلم تانى
    احسن حاجه اننا كنا ايد واحده وان شاء الله سنظل اي واحده
    مبارك واعوانع ارادوا الدنيا
    اما نحن فلنا الاخره
    نورتينى

    ردحذف
  7. نيلى
    اولا انا سعيد بوجودك هنا فى مدونتى المتواضعه
    عايز اقولك ان عذاب مبارك عن ربنا اشد
    تحياتى ليكى

    ردحذف
  8. ام هريره
    بقالك فتره غايبه عن زياره مدونتى
    لعل المانع خير
    نورتينى وشكرا على زيارتك
    تحياتى ليكى

    ردحذف
  9. اختيار رائع لشاعر رائع
    يتحدث لفيه عن شعور الملايينت
    دمت أخي في حفظ الرحمن

    ردحذف
  10. الكلمات حلوة
    بس عندى احساس انها مش كلمات نجم

    دى مش سكته

    ردحذف
  11. قصيدة رائعة من قلب مصري حقيقي يحاكي وجع الكثيرين "
    ؛؛
    ؛
    شريف
    كنت رائع هنا حقاً قرأتها مرتين
    لروحك عبق الغاردينيا
    كانت هنا
    reemaas

    ردحذف
  12. "فعلا يهمك أمرنا
    بينا عالنائب العام .. تفتنله على ولاد الحرام ... مصوا بلدنا و دمنا
    و افتن دي فتنة مش حرام .. ده حقنا
    "

    جمييييييلة تسلم ع النقل واحساسها عالي
    لولا

    ردحذف
  13. هشام
    شكرا على كلامك الرائع
    نورتينى

    ردحذف
  14. الشاعر
    اولا شكرا على زيارتك
    ثانيا دى بتاعه فؤاد نجم
    ومش مشكله كما قلت هى بتاعه مين المهم انها معبره
    وانك زورتينى

    ردحذف
  15. ريماس
    بنورينى دايما بزياراتك وكلامك الحلو
    بس ده مش كلامى ده كلام فؤاد نجم
    نورتينى

    ردحذف
  16. لولا
    ربنا يخليكى وشكرا على زيارتك
    نورتينى

    ردحذف
  17. بجد هوا حد جامد جدا وبالذات فالشعر وفرأيو السياسي

    وبنته كمان
    بالتويق:)

    تحياتي

    ردحذف
  18. شكرا ليك على القصة وبجد متشكر وردى كان عليها

    ردحذف
  19. حلوة اووووووووى يا شريف

    تسلم ايدك على النقل المتميز ومبسوطه انى جيت هنا

    ان شاء الله يدوم التواصل

    ردحذف
  20. ليس فقيرا من يحب
    اولا بشكر سونى وكيمو اللى تواصلو معايا بس تعليقاتهم لم تظهر هنا فى المدونه نتيجه وجود عطل فى البلوج الفتره الماضيه ولكنها ظهرت فى رسائل الميل
    ثانيا:طبعا انتى نورتينى والتواصل بينا ان شاء الله يكون موجود
    بشكرك وتحياتى ليكى

    ردحذف